حول تغيير "السايبي "...ادارة النادي الإفريقي توضح قرارها

 حول تغيير "السايبي "...ادارة النادي الإفريقي توضح قرارها 

🔴 بعد المباراة ب24 ساعة و بعد ما كل واحد عطى رأيو و خرجولنا العباقرة متع التحليل الفني و كل واحد حكى إلي عندو و تقريبا إستمعت للأراء الكل و قريت التعاليق متع أصدقائي الأعزاء إلي إختلفت فيها وجهات النظر، توة لازمنا نحطو النقاط على الحروف و نعملو تحليل منطقي بكل عقلانية و حرفية و بالتروي المطلوب و الهدوء التام بش يكون التشخيص بطريقة علمية و صحيحة 

✅ أولا و بالذات كان تزرفت ضربة الجزاء متع النادي الإفريقي و خرجنا رابحين راهو 90% من الكلام إلي قاعد يدور في الباجات رانا ما شفناهوش جملة و مع الأسف فما حكاية ما كانتش موجودة قبل في النادي الإفريقي ظهرت منذ سنة 2018، كل ما نعملو تعادل أو هزيمة لازم فما شكون يعملوه كبش نطيح و لازم هو يهزها القضية الكل، مرة مدرب، مرة ملاعبي، تصورو يا رسول الله فئة مقرفة جدا إلي أنا شخصيا مانيش مستعرف بيهم أولاد جمعية و أشك حتى في فهمهم لكرة القدم، وصلنا للغة فلان عتبة و لغة براس أمك سيبها الجمعية و هو تلقاه لهماڤ، عايق والديه، مكروه في حومتو، حتى من وجهو حاشى خليقة الرحمان ڤُهدي و حتى في السيفيل ما عندوش قدر حدو باج بودورو يتفاعل فيها كان هو و كمشة هوكش كيفو ماركة تلغميج متع نساء و دخان و تقطيع و ترييش متع ڤعار، كان تقلو كانك راجل ورينا وجهك و واجه الرجال أتو نخرجولك رواندك و تاريخك يخاف و يلبد على خاطرو هو أصلا لا يمت بصلة بالنادي الإفريقي و بالرجولة 

🔴 المدرب سعيد السايبي بش يواصل تدريب الفريق و ما فماش تبديل متع مدرب في الوقت الحالي، عمناول وقتلي النادي الإفريقي أمورها تاعبة فنيا و فرق كيما باجة و بن قردان و منستير يربحو فينا في رادس ما فما حتى مدرب جاء قال نحب نراني الكلوب بخلاف سعيد السايبي إلي ما وخرش التالي و تحمل المسؤولية و في ظرف 3 شهر فقط بلاش إنتدابات و بلاش أظهرة و في ظروف يعلم بيها كان ربي ربح الفرق الكبيرة الكل و كمل مرتبة ثالثة و عمل فستيار نظيفة و الإنتدابات الكل عملهم هو و أي ملاعبي مهما كان إسمو يتعدى على السكانار و يعمل إختبارات دقيقة يدخل فيها الجانب الفني و النفسي و الجاهزية البدنية و مدى تأقلم اللاعب موش كيما برشا مدربين جيب على بعضو قال شنية ملاعبي بإسمو و ياخذ الكوميسيون متاعو يحطها في مكتوبو و يقسم مع وكيل اللاعب و ديما يمشي و قيّد على لغة العصفور النادر و مبعد الجمعية تمشي في الساقين، سعيد السايبي لا، تعمل إختبارات و يشوفك الستاف و كان عندك في ساقيك و تقدم الإضافة مرحبا بيك. سعيد السايبي صحيح غلط في التغييرات البارح و زاد تأكد إلي فما ملاعبية معادش تنجم تقدم إضافة، أولادنا و نحبوهم أما العاطفة في الكورة موش باهية و تضر الڤروب

✅ على فكرة النادي الإفريقي ضد قوافل قفصة قدم مستوى أفضل بكثير من مباراة بن قردان لكن النتيجة ما تبعتش، هوني بش تفهم العباد كونو الفايدة في النتيجة النهائية و الإنتصار قبل المردود، الموسم مازال طويل و كيما قلت البارح في اللايف بش تجينا في السيزون أوقات صعيبة وقتها وين بش تظهر رجالات النادي الإفريقي و بش تظهر المواقف الصحاح بش نتجاوزو الأوقات الصعيبة و العراقيل بش نكونو أبطال تونس خاطر وقت الفرحة و وقت التتويج راهو الناس الكل محلاها و الناس الكل باهين و كل شيء يبدى مريڤل كي الزيت فوق الماء أما وقت الشدة تعرف صاحبك من عدوك

🔴🔴 ميساج للملاعبية الكل إن شاء الله ربي يوفقكم، كملو ألعبو كيما لعبتو الشوط الأول ضد قوافل قفصة مع تجسيم الفرص و راهو أي جمعية بش تلعب ضدنا بش تلقى الحارس يتسهوك و يضيّع في الوقت و بش يلعبو الدفاع المفرط، الجمهور متع النادي الإفريقي أقوى جمهور في تونس و ما فماش كيفو راهو مساندينكم في السراء و الضراء و وجودو معاكم مكسب كبير ليكم، راهو وين تمشي في أي بلاصة في الجمهورية التونسية و في العالم تلقى جمهور الكلوب و قدرك عالي و راسك مرفوع خاصة كي تبل المريول و تجيب الأطراح 

 شهر سبتمبر بش نلعبو فيه طرح كبير ضد لتوال في سوسة و مباراة كأس إتحاد إفريقي الهدف متاعها بلوغ دوري المجموعات، نكملو نخدمو على رواحنا و بحول الله الجاي خير و الإفريقي ديما لباس